મોરબીમાં રેમડેસીવીર ઇન્જેક્શનની છેલ્લા કેટલાંક દિવસોથી અછત વર્તાઈ રહી હોય અને દર્દીઓના સગાને ઇન્જેક્શન મેળવવા રઝળપાટ કરવાનો વારો આવ્યો છે. ત્યારે ગઇકાલે રેમેડીસીવર ઇન્જેક્શન હોમ આઇસોલેશનના દર્દીઓને વિતરણ બંધ કરી દેતાં દર્દીઓના સગા કલેક્ટર બંગલે દોડી ગયા હતા. ત્યારે તંત્ર દ્વારા ઇન્જેક્શન વિતરણ વ્યવસ્થા માટે 7 ટીમોની રચના કરવામાં આવી છે.
મોરબી જીલ્લામાં કોરોના દર્દીઓની સારવાર કરતી કોઈપણ કોવીડ ડેઝીગ્નેટેડ હોસ્પિટલ, કોવીડ હેલ્થ કેર સેન્ટર કચેરી દ્વારા આપવામાં આવેલ ઈમેલ આઈડી sdmmorbi.covid19@gmail.com પર સાંજે 9 થી સવારના 9 સુધીમાં ઓક્સીજન બેડમાં સારવાર લઇ રહેલ દર્દીની વિગતો સાથેનું indent form તથા દરેક દર્દીના આધારકાર્ડ અને દર્દીનો કોરોના પોઝીટીવ રીપોર્ટ સ્કેન કરી અપલોડ કરવાનો રહેશે. જે મુજબ જરૂરિયાતને ધ્યાને લઈને મેઈલમાં અપલોડ કરેલ ડોક્યુમેન્ટ વેરીફાઈ, દરેક કોવીડ ડેઝીગ્નેટેડ હોસ્પિટલ સ્ટાફ કોરોના મહામારી કામગીરીમાં વ્યસ્ત હોય જેથી મહેસુલી કર્મચારીઓની ટીમો બનાવી દરેક હોસ્પિટલ અથવા કોવીડ સેન્ટરને રૂબરૂ જઈને રેમડેસીવીર ઇન્જેક્શન જથ્થો પૂરો પાડવામાં આવશે અને સ્થળ પરથી રૂબરો જઈને ઓરીજીનલ ડોક્યુમેન્ટ મેળવી લેશે.
આ કામગીરી માટે 2 નાયબ મામલતદારોની ખાસ વેરીફીકેશન ટીમો બનાવી છે. તેમજ ઇન્જેક્શન હોસ્પિટલ સુધી પહોચાડવા માટે 7 ટીમોની રચના કરવામાં આવી છે જે પૈકી ૫ ટીમો મોરબી શહેર અને તાલુકા માટે જયારે 1 ટીમ વાંકાનેર શહેર-તાલુકા અને 1 ટીમની હળવદ શહેર અને તાલુકા માટે રચના કરવામાં આવી છે.
